अकोला जिल्ह्यातील बार्शीटाकळी तालुक्यातील दगडपारवा या गावांमध्ये म्हैस पाहण्यासाठी गेलेल्या आईसह दोन मुलींचा दगडपारवा धरणात दुर्दैवी मृत्यू झाल्याची घटना उघडकीस आली आहे. घटनेची माहिती मिळताच बार्शी टाकळी पोलीस घटनास्थळी पोहोचले असून पंचनामाची प्रक्रिया सुरू करण्यात आली आहे.
बार्शिटाकळी तालुक्यातील दगडपारवा येथे शेतीसाठी जल सिंचन व पाणी टंचाई कालावधीमध्ये पिण्याच्या पाण्याची व्यवस्था होण्याकरिता काटेपूर्णा धरणाला पर्याय म्हणून सदर प्रकल्प विद्रुपा व त्रिगुणा नदीच्या संगमावर निर्माण करण्यात आला आहे. प्रकल्पामध्ये मुबलक प्रमाणात पाणीसाठा उपलब्ध असून या ठिकाणी दगडपारवा येथील ग्रामस्थ पाण्याचा उपयोग घेत असतात परंतु काल रविवार 1 मे रोजी दगडपारवा येथील प्रकल्पग्रस्त सरिता सुरेश घोगरे 42 वर्ष ही महिला या प्रकल्पाच्या जवळच येत असलेल्या शेतातील
म्हैसीला आणण्यासाठी शेतात गेली असता उशीर झाल्याने तीला पाहण्यासाठी या महिलेच्या वैशाली सुरेश घोगरे 14 वर्ष, अंजली सुरेश घोगरे 16 वर्ष ह्या दोन मुली गेल्या असता या प्रकल्पाच्या सांडव्याच्या ठिकाणी गेल्या असता एकमेकांना वाचविण्यासाठी प्रयत्न केला मात्र घसरून पाण्याचा अंदाज न आल्याने बुडून मृत्यू झाल्याची घटना घडल्याने एकच खळबळ उडाली आहे.
ह्या तिघीही मायलेकी उशीरापर्यंत घरी न पोहोचल्याने त्यांची रात्री 2 वाजता पर्यंत बरीच शोधाशोध सुरू केली असता त्यांचा दगडपारवा प्रकल्पाच्या सांडव्यातील खोल पाण्यात सरिता सुरेश घोगरे 42 वर्ष, वैशाली सुरेश घोगरे 14 वर्ष, अंजली सुरेश घोगरे 16 वर्ष रा.दगडपारवा ह्या बुडाल्याच्या घटनेचा उलगडा झाला असता घटनेची माहिती बार्शीटाकळी पोलिसांना देताच पोलिस घटनास्थळी पोहोचले असून आज सोमवार 2 मे रोजी सकाळी ८ वाजताच्या सुमारास गावकऱ्यांना धरणाच्या सांडवाच्या पाण्यात या तिघांचे मृतदेह आढळून आलेत. बचाव पथकासह गावकऱ्यांच्या मदतीने तिघीही मायलेंकीचे मृतदेह पाण्यातून बाहेर काढण्यात आले.
घटनास्थळ पंचनामा करण्यात आल्यानंतर तिघेही मायलेकींचा मृतदेह उत्तरीय तपासणीसाठी सर्वोपचार रुग्णालय अकोला येथे पाठविण्यात आला आहे. पुढील तपास बार्शीटाकळी पोलिसांनी सुरु केला आहे. तिघीही मायलेंकीचा दुर्दैवी मृत्यू झाल्याने दगडपारवा गावात शोककळा पसरली असून हळहळ व्यक्त केली जात आहे.
