हिवरखेड(धीरज बजाज)- गोरक्षकांवरील हल्ला प्रकरणात मुख्य सूत्रधार असलेल्या आरोपीवर गुन्हे दाखल करून अटक करावी, गोरक्षकांवरील खोटे गुन्हे मागे घ्यावे व खोटे गुन्हे दाखल करणाऱ्या ठाणेदारावर कार्यवाही करावी अशी मागणी करीत घटनेच्या निषेधार्थ मंगळवारी हिवरखेड कडकडीत बंद पाळण्यात आला.
सविस्तर असे की दि 9 एप्रिल रोजी पहाटे दानापूर परिसरात 40 गोवंशांना वाचविल्यावर पोलिसांसह, बजरंग दलाचे कार्यकर्ते व शेतकरी युवक गुरांना हिवरखेड पोलीस ठाण्यात आणत असताना सोनवाडी फाट्याजवळ गोतस्करांनी मोठा जमाव आणून गोरक्षकांवर आणि पोलिसांवर हल्ला करून 40 पैकी 36 गोवंश घेऊन पसार झाले होते. यावेळी झालेल्या मारहाणीत अनेक गोरक्षक जखमी झाले होते तर दुसऱ्या गटातील एक व्यापारी सुद्धा जखमी झाला होता.
तत्पूर्वी पशुप्रेमींनी दिनांक ९ च्या रात्री दोन वाजता पोलिसांना गोवंशाचे तस्करी होत असल्याची माहिती सुद्धा दिली होती . परंतु एवढे गंभीर प्रकरण असूनही ठाणेदार स्वतः घटनास्थळी गेले नाहीत. पोलिसांचा स्टाफ कमी असल्याने घटनास्थळी फक्त तीनच पोलीस गेले त्यामुळे त्यांनी शेतकरी लोकांना आणि बजरंग दलाच्या कार्यकर्त्यांना गुरे हाकलत पोलीस ठाण्यापर्यंत सोबत चलण्याची विनंती केली. दुसरीकडे गोतस्करांनी मोठा जमाव आणून हल्ला केला. त्यांनी पोलीस शिपायांना लोटालाटी करून पशु प्रेमींनवर हल्ला चढविला.
या हल्ल्यादरम्यान तस्करांनी 40 पैकी 36 गुरे घेऊन गेले तर चार गुरे पोलीस ठाण्यात सुखरूप आणली गेली. पशुप्रेमींनी पोलिसांना सर्वतोपरी सहकार्य केले. आणि या प्रकरणाच्या मुख्य सूत्रधाराचे नाव सुद्धा सांगितले व 40 गोवंश पकडल्यावर तो सूत्रधार हजर असतानाचा व्हीडिओ सुद्धा दाखविल्याचे म्हटले. परंतु उलटपक्षी गोरक्षकांवरच गुन्हे दाखल झाले दुसरीकडे हल्ला करणाऱ्या मोठ्या जमावापैकी फक्त 7 जनांवरच गुन्हे दाखल झाले. इतर हल्लेखोर व मुख्य सूत्रधार आरोपीवर कोणतीच कार्यवाही झाली नाही. या निषेधार्थ बजरंग दल, विश्व हिंदू परिषदेच्या वतीने सोमवारी तेल्हारा येथे कडकडीत बंद ठेवून जाहीर निषेध पुकारला. मंगळवारी हिवरखेड ची बाजारपेठ सकाळी 7 ते दुपारी 2 वाजेपर्यंत स्वयंस्फूर्तीने कडकडीत बंद ठेवण्यात आली. वरिष्ठ अधिकारी या प्रकरणात कोणती भूमिका घेतात याकडे नागरिकांचे लक्ष लागले आहे.
अनेक प्रश्न उपस्थित:-
पोलिसांच्या ताब्यातून पळवून नेलेली 36 गुरे जप्त करण्यात आली काय?
त्या गुरांचे काय झाले?
गोरक्षकांनी पोलिसांना मदत केल्यावरही यांच्यावरच खोटे गुन्हे का दाखल झाले?
मुख्य सूत्रधार आरोपीचे नाव गोरक्षक सांगत असले तरी त्याच्यावर कार्यवाही का नाही?
ज्या 3 पोलिसांनी आपला जीव धोक्यात घालत गो तस्करांकडून आलेल्या जमावाचा सामना केला त्यांची फिर्याद घेण्याऐवजी घटनास्थळी हजर नसलेल्या ठाणेदारांनी फिर्याद का दिली असावी?
इतके गंभीर प्रकरण असूनही ठाणेदार स्वतः घटनास्थळावर तात्काळ का पोहोचले नाहीत?
असे अनेक प्रश्न यानिमित्ताने उपस्थित झाले आहेत.
