अकोला- आपल्या स्वतःच्या पोटच्या १३ महिन्याच्या मुलीची हत्या करून आईने आत्महत्या करण्याचा प्रयत्न केल्याची धक्कादायक घटना जिल्ह्यातील बाभूळगाव येथे घडली आहे.
प्राप्त माहितीनुसार बाभूळगाव येथील रहिवासी प्रियंका उमेश बोबडे (वय २६, राहणार, बाभुळगाव, जि. अकोला.) अस आईचं नाव असून मुलीचं नाव अधिरा उमेश बोबडे असं आहे. अकोला शहरातील एमआयडीसी पोलीस स्टेशन हद्दीतील बाबुळगाव येथे सोमवारी दुपारी हा प्रकार उघडकीस आला.आपल्या १३ महिन्याच्या चिमुकलीची गळा दाबून हत्या करून आईने हाताची नस कापून आत्महत्या करण्याचा प्रयत्न केला आहे. ही घटना काल अकोल्यातील बाभूळगाव येथे घडली. घरातील इतर व्यक्तींच्या हा प्रकार लक्षात येताच त्यांनी सदर महिलेस अकोला शासकीय वैद्यकीय महाविद्यालय व सर्वोपचार रुग्णालयात उपचारासाठी दाखल केले.
एमआयडीसी पोलीस ठाण्याच्या हद्दीत असलेल्या बाभूळगाव येथील प्रियंका बोबडे या महिलेने सोमवारी आपल्या १३ महिन्याच्या मुलीची गळा दाबून आधी हत्या केली. त्यानंतर तीने स्वत:च्या डाव्या हाताची नस कापून तसेच कापडाच्या ओढणीने स्वत:चा गळा दाबून आत्महत्येचा प्रयत्न केला. ही घटना घरातील इतर व्यक्तींच्या लक्षात येताच त्यांनी ‘त्या’ महिलेला तत्काळ शासकीय वैद्यकीय महाविद्यालय व सर्वोपचार रुग्णालयात उपचारासाठी दाखल केले, अशी माहिती पोलीस सुत्रांनी दिली.महिलेची प्रकृती गंभीर असल्याने तिला आयसीयूमध्ये ठेवण्यात आले आहे. दरम्यान या हत्येमागील तसेच आत्महत्या करण्याच्या प्रयत्नबाबत अद्याप कारण स्पष्ट होऊ शकलेलं नाही. मात्र सध्यास्थित याप्रकरणी महिलेच्या पतीच्या तक्रारीवरून महिलेविरूद्ध गुन्हा दाखल करण्यात आला आहे. जिल्हा पोलीस अधिक्षक जी. श्रीधर यांच्या मार्गदर्शनात एमआयडीसी पोलिस स्टेशनचे ठाणेदार किशोर वानखडे हे पुढील तपास करत आहेत.
