अकोला- अकोला जिल्ह्यातील मूर्तिजापूर तालुक्यातील हिरपुर या गावातील एका आठ महिन्याच्या चिमुकलीला चक्क HIV संक्रमित व्यक्तीचे रक्त दिल्याने चिमुकली संक्रमित झाल्याची धक्कादायक घटना घडली असून या प्रकरणी पिडीत चिमुकलीच्या वडीलाने आरोग्यमंत्र्याकडे तक्रार दाखल केली आहे.
मिळालेल्या माहितीद्वारे हिरपूर येथील दाम्पत्याने आपल्या आठ महिन्याच्या चिमुकलीला मूर्तिजापूर येथील एका खासगी रुग्णालयात दाखल करण्यात आले होते. डॉक्टरांनी पांढऱ्या पेशी कमी असल्याचे सांगून अकोला येथील बी पी ठाकरे रक्त पेढी मधून पांढरे रक्त बोलावण्यात आले परंतु ते रक्त एचआयव्ही पॉझिटिव्ह असल्याने आठ वर्षांच्या निष्पाप बालीकेलाही एचआयव्ही संक्रमित व्हावे लागले.
चिमुकलीवर रुग्णालयात उपचार चालू असताना एका आठ महिन्याच्या चिमुकलीचा ताप काही केल्या कमी होत नव्हता डॉक्टरांनी विविध तपासण्या केल्या नंतर सदर चिमुकलीच्या पांढऱ्या पेशी कमी झाल्याचे डॉक्टरांनी सांगितले, यासाठी पांढऱ्या रक्ताची आवश्यकता आहे ते तिला देणे गरजेचे असून अकोला येथील बी.पी.ठाकरे रक्तपेढीतून रक्त आण्याचा सल्ला बालीकेच्या पित्याला देण्यात आला.
पित्याने अकोल्याहून रक्त आणून ते संकलीत केलेले रक्त आठ महिन्याच्या चिमुकलीला देण्यात आले परंतु काही केल्या तिचा ताप व पेशी वाढत नव्हत्या त्या मुळे जास्त वेळ न घालवता सदर बालीकेला मूर्तिजापूर येथून अमरावती येथील एका खासगी रुग्णालयात हलविण्यात आले. तेथील डॉक्टरांना एचआयव्ही असल्याचा संशय आल्याने बालीकेची एचआयव्ही तपासणी करण्यास सांगीतले तपासणीअंती तिचा अहवाल पॉझिटिव्ह आल्याने या दाम्पत्यांची पायाखालची जमीनच सरकली.
यानंतर मुलीचा अहवाल पॉझिटिव्ह आल्याने डॉक्टरांनी आईवडीलांना एचआयव्ही तपासणी करण्यास सांगीतले असता दोघांचाही अहवाल निगेटिव्ह आला. त्या दोघांचाही अहवाल निगेटिव्ह असताना मुलगी पॉझिटिव्ह कशी आली? ही शंका त्यांना स्वस्थ बसू देत नव्हती त्या दिशेने शोध घेतला असता संक्रमित रक्त चढविल्याने तिही संक्रमित झाल्याचे निष्पन्न झाले.
डॉक्टरांनी सांगितलेल्या रक्तपिढीतून हे रक्त आणण्यात आले होते, रक्तपेढी कडून झालेल्या अक्षम्य चुकीमुळे चिमुकलीला या भयंकर आजाराचा आयुष्यभर सामना करावा लागणार आहे. आता न्याय मिळण्यासाठी चिमुकलीच्या पित्याने आरोग्य मंत्री, पालकमंत्री, जिल्हाधिकारी यांच्या सह विविध ठिकाणी तक्रार दाखल केली आहे.
