नवी दिल्ली : देशात कोरोना महारोगराईची दुसरी लाट पूर्णतः ओसरलेली नाही. अशात कोरोनावर नियंत्रण मिळवण्यासाठी वेगाने लसीकरण अभियान राबवले जात आहे. परंतु, त्यातच काही राज्‍यात लसीचा तुटवडा निर्माण झाला असून अनेकांना लसीच्या प्रतिक्षेत थांबावे लागत आहे. दरम्यान, ‘कोव्हिशिल्ड’ लसीच्या पहिल्या डोसनंतर दुसरा डोस ६ ते ८ आठवड्यांनी देण्याच्या सूचना केंद्राने राज्यांना केल्या आहेत. याआधी कोव्हिशिल्ड लसीच्या पाहिल्या आणि दुसऱ्या डोसमधील अंतर ४ ते ६ आठवडे होते. त्यानंतर पुन्हा गेल्या महिन्यात १३ मे रोजी केंद्र सरकारने कोव्हिशिल्ड लसीच्या दोन डोसमधील अंतर ६ ते ८ आठवड्यांवरून दुप्पट करत १२ ते १६ आठवडे निश्चित केले. त्यावरून राजकीय वातावरण तापले असतानाच आता केंद्र सरकारच्या नॅशनल टेक्निकल अॅडवायजरी ग्रुप ऑन इम्युनायझेशन (NTAGI) मधील काही वैज्ञानिकांनी, दोन डोसमधील अंतर दुप्पट करण्याची शिफारस केलीच नव्हती, असा धक्कादायक दावा केला आहे. तसेच या निर्णयाला, आमचा पाठिंबा नव्हता, असा खुलासा या गटातल्या ३ सदस्यांनी केला आहे. यासंदर्भात एका प्रसिद्ध वृत्तपत्राने वृत्त दिले आहे. त्यामुळे आता केंद्र सरकारच्या या निर्णयावर प्रश्नचिन्ह उपस्थित केले जात आहेत.
केंद्राने कोरोनाच्‍या रुग्‍णसंख्‍येवर नियंत्रण आणण्यासाठी कोरोना प्रतिबंध लसीकरणावर भर देण्यात येत आहे. सध्या देशात कोव्हिशिल्ड आणि भारत बायोटेकची कोव्हॅक्सिन लस देण्यात येत आहे. मात्र, देशात लसींचा तुटवडा आहे. त्यातच केंद्र सरकारने कोव्हिशिल्डच्या दोन डोसमधील अंतर १२ ते १६ करण्याचा निर्णय जाहीर केला. हा निर्णय केंद्र सरकारच्या नॅशनल टेक्निकल अॅडवायजरी ग्रुप ऑन इम्युनायझेशन (NTAGI) या गटाने दिलेल्या सल्ल्यावरून सांगण्यात आले होते. मात्र याच गटातील यापैकी काही तज्ज्ञांनी या निर्णयाला आपण कधीही समर्थन दिले नाही, असा खुलासा केला आहे.
दरम्यान, NTAGI च्या वैज्ञानिकांनी ८ ते १२ आठवड्यांपर्यंत अंतर वाढवण्यावर सहमती दर्शवली होती. जागतिक आरोग्य संघटनेकडून देखील हाच सल्ला देण्यात आला होता. तथापि १२ ते १६ आठवडे हा निर्णय केंद्र सरकारचा आहे. तर केंद्र सरकारच्या सध्याच्या दोन डोसमधील अंतर वाढविण्याच्या निर्णयानुसार संभाव्य कोणते परिणाम होऊ शकतात, याचा कोणताही तपशील NTAGI कडे नाही, असे नॅशनल इन्स्टिट्यूट ऑफ एपिडेमोलॉजीचे माजी संचालक एम. डी. गुप्ते रॉयटर्सशी बोलताना म्हणाले. त्यांच्या दाव्याला NTAGI मधील दुसरे सदस्य मॅथ्यु वर्गेसी यांनी दुजोरा दिला आहे.
त्याचबरोबर याच गटातील दुसरे एक सदस्य जे. पी. मुलीयिल यांनी देखील गुप्ते यांच्या त्या दाव्याला दुजोरा देत, तज्ज्ञांच्या गटामध्ये दोन डोसमधील अंतर वाढवण्याबाबत चर्चा झाली होती. पण आमच्या गटाणे दोन डोसमधील अंतर हे १२ ते १६ आठवडे करा असे आम्ही म्हटलोच नाही. तसेच कोणतीही आकडेवारी सांगितली गेली नाही, असे ते म्हणाले.
दरम्यान, केंद्र सरकारने कोव्हिशिल्डच्या दोन डोसमधील अंतर १२ ते १६ करण्याचा निर्णय जाहीर केला. यानंतर देशातील अनेक घटकांनी त्यावर आक्षेप घेतला होता. लसींच्या तुटवड्यामुळेच केंद्र सरकारने असा निर्णय घेतल्याचा आरोप राजकीय पटलावर झाला. मात्र, हा निर्णय लसींच्या तुटवड्यामुळे नसून तज्ज्ञ वैज्ञानिकांच्या शिफारशींनुसार घेण्यात आल्याचे केंद्राकडून सांगण्यात आले.
दरम्यान, केंद्र सरकारच्या कोरोना हाताळण्याच्या पद्धतीवर टीका करत वायरोलॉजिस्ट शाहीद जमील यांनी देखील यावर तीव्र आक्षेप घेतला होता. तसेच त्यावेळी त्यांनी, दोन डोसमधील अंतर दुप्पट करण्याच्या निर्णयामागची कारणे संबंधित यंत्रणांनी स्पष्ट करावीत, अशी मागणीही त्यांनी केली होती. तसेच त्यांनी, ज्या काळात कोरोनाचा प्रसार मोठ्या प्रमाणावर होत आहे, त्या काळात आपण मोठ्या प्रमाणावर लोकांना लस द्यायला हवी असेही म्हटले होते.
