वीजबिल न भरल्याने  खांबोरा आणि ८४ खेडी पाणीपुरवठा योजनेचा वीज पुरवठा पुन्हा खंडित

अकोला(प्रतिनिधी)– जिल्ह्यातील खांबोरा आणि ८४ खेडी अकोट पाणी पुरवठा योजनेचा वीज पुरवठा १.६४ कोटीच्या थकीत वीजबिलासाठी महावितरणकडून खंडित करण्यात आला आहे.तसेच अकोला शहर आणि बार्शीटाकळी येथील पथदिव्यांवर कारवाईची टांगती तलवार असल्याने पुढील तीन दिवसात कारवाई होणे अपेक्षीत आहे. त्यामुळे निर्माण झालेल्या कृत्रिम पाणी टंचाईला  महावितरण जबाबदार नसल्याचे महावितरणकडून स्पष्ट करण्यात येत आहे.वीजबिल वसूलीसाठी महावितरण प्रत्येक थकबाकीदार ग्राहकांच्या घरापर्यंत पोहचत असतांना, खांबोरा आणि ८४ खेडी अकोट पाणी पुरवठा योजनेकडे अनुक्रमे १.०८ आणि ५६ लाखाचे वीजबिल थकित आहे. संबंधित विभागाकडून वीजबिल भरण्यास प्रतिसादच मिळत नसल्याने दिनांक१६ मार्च रोजी खांबोरा आणि १८ मार्च रोजी ८४ खेडी अकोट पाणी पुरवठा योजनेचा वीज पुरवठा थकित बिलासाठी खंडित करण्यात आला होता.परंतू जनभावनेचा आदर करत कृत्रिम जलसंकट निर्माण होऊ नये म्हणून महावितरणने संबंधित विभागाच्या वीजबिल भरण्याच्या आश्वासनावर खंडित केलेला वीज पुरवठा महावितरणकडून जोडण्यात आला होता.पण  जिल्हा प्रशासनाने वीजबिल भरण्याची तसदी न घेतल्याने १.०८ कोटीसाठी खांबोरा पाणी पुरवठा योजनेचा तर ५६ लाखासाठी ८४ खेडी अकोट पाणी पुरवठा योजनेचा वीज पुरवठा महावितरणला नाईलाजस्तव पुन्हा खंडित करावा लागला आहे.तसेच अकोला महानगर पालिकेकडे पथदिव्यांच्या वीजबिलापोटी  १ कोटी ८० लाख रूपये थकित आहे.बार्शीटाकळी नगरपंचायतीकडे पथदिव्याचे थकित असलेल्या १ कोटी रूपयापैकी फक्त ६ लाख रूपयेच आतापर्यंत भरल्या गेले आहे. त्यामुळे दोन्हीही विभागांशी पाठपुरावा करण्यात आला आहे. त्यामुळे पुढील दोन दिवसात अकोला महानगर पालिकेकडून तसेच बार्शीटाकळी नगरपंचायतीकडून वीजबिलाचा भरणा करण्यात आला नाही तर अकोला शहर आणि बार्शीटाकळी शहर हे अंधारात जाणार आहे.