अकोला :- स्थानिक खदान पोलिस ठाणे अंतर्गत येणाऱ्या नेहरू पार्क चौक परिसरात शनिवारी रात्री दगडाने ठेचून एका इसमाची हत्या करण्यात आली असल्याची घटना उघडकीस आली. सदर घटनेतील आरोपी हे अज्ञात असल्याचे पोलिसांनी सांगितले.
शहरात दिवसेंदिवस गुन्हेगारी वाढत असून सद्यस्थितीत ही गुन्हेगारी पोलिसांकरिता डोकेदुखी ठरली आहे. शनिवारी रात्री खदान पोलिस ठाणे अंतर्गत येणाऱ्या नेहरू पार्क चौकात एका 35 वर्षीय इसमाची हत्या करण्यात आल्याची घटना उघडकीस आली. पोलीस सूत्रांच्या माहितीनुसार सदर इसमाचे नाव श्याम शंकर घोडे असून तो इसम गवंडीकाम करतो. तसेच खदान परिसरातील सरकारी गोडावून मागे त्याचे घर असल्याची माहिती पोलिसांनी दिली. या प्रकरणात आरोपी फरार असून खदान पोलिस त्यांचा शोध घेत आहेत.
सदर घटनास्थळी पोलिसांनी पाहणी केली असता तेथे चिलम व छापे आढळून आले असल्याची माहिती सूत्रांनी दिली आहे. सध्या प्राथमिक दृष्ट्या सदर खून हा व्यसनातून झाला असल्याचा अंदाज व्यक्त केला जात आहे.
