अकोट तालुक्यातील सावरा येथील अल्पभूधारक शेतकरी स्वर्गीय गजानन दौलत सपकाळ वय 50 यांनी आपल्या राहत्या घरी गळफास घेऊन आत्महत्या केली होती. गजानन सपकाळ हे फक्त शेतीच्या भरवश्यावर संसाराचा गाडा चालवणे शक्य नसल्याने गवंडी कामावर जाऊन आपल्या कुटुंबाचा उदरनिर्वाह करत होते परंतु करोनामुळे लॉकडाऊनच्या काळात सर्व धंदे-मजुरी बंद असल्याने तसेच त्यांनी शेतीसाठी बँकेकडून व खाजगी सावकाराकडून कर्ज घेतले होते. त्यांना गेल्या अनेक वर्षांपासून शेतीत अपेक्षित यश मिळत नसल्यामुळे लागणारा खर्च व त्यातून मिळणारे तुटपुंजे उत्पन्न यामुळे आलेला कर्जबाजारीपणा यामुळे हे कर्ज कसे फेडावे या चिंतेतूमुळे त्यांना आत्महत्या करण्याखेरीज उपाय उरला नव्हता या नैराश्यातून त्यानी आपली जीवनयात्रा संपविली.
त्यानिमित्ताने शेतकऱ्यांसाठी काम करणाऱ्या व नटसम्राट नाना पाटेकर व आदर्श अभिनेते मकरंद अनासपुरे यांनी स्थापन केलेल्या “नाम फाउंडेशन” या सामाजिक संस्थेच्या माध्यमातून त्याच्या कुटुंबाला सानुग्रह मदत म्हणून 15 हजार रुपयांचा धनादेश आज त्याची विधवा पत्नी श्रीमती मीना गजानन सपकाळ यांना देण्यात आला. ही मदत नाम फाउंडेशन चे विदर्भ व खानदेश चे समन्वयक हरीश इथापे यांच्या मार्गदर्शनात व नाम फाउंडेशन चे जिल्हा समन्वयक माणिक शेळके यांच्या हस्ते देण्यात आली.
आतापर्यंत नाम फाउंडेशनने विदर्भ व मराठवाडा या भागात आठ गावे दत्तक घेतली असून अनेक जिल्ह्यांमध्ये जलसंधारण, तलाव खोलीकरण, नद्यांमधील गाळ उपसणे अशी अनेक समाजोपयोगी कामे लोकसहभागातून केली आहे तर आत्महत्याग्रस्त शेतकरी कुटुंबातील विधवा महिलांना सानुग्रह मदत म्हणून पंधरा हजार रुपये नाम फाउंडेशन च्या वतीने देण्यात येते अथवा या कुटुंबातील महिलांना आर्थिक दृष्ट्या सक्षम करण्यासाठी त्यांना शिलाई मशीन, शेळ्या व इतर रोजगाराचे साहित्य मदत म्हणून देण्यात येते. आतापर्यंत अकोला जिल्ह्यातील 37 शेतकरी आत्महत्याग्रस्त विधवा महिलांना शिलाई मशीनचे वाटप करण्यात आले असून 23 कुटुंबांना पंधरा हजार रुपयांचे धनादेश वितरीत करण्यात आले आहेत.ही मदत देतावेळी गावातील प्रतिष्ठित नागरिक प्रकाश दही, नामचे प्रा. नितीन ढोरे, निलेश नारे, सतीश पुनकर, प्रदीप दही व आदी मान्यवर उपस्थित होते.
