अकोला, दि.११– निंब वृक्षाच्या रोपाची लागवड करुन आपण आपला परिसर हिरवागार करु शकतो. त्याचे अनेक फायदे आपल्याला होतील. हे वृक्ष लागवड करुन त्यांची योग्य निगा राखण्याच्या या उपक्रमात सर्व ग्रामस्थांनी सहभागी व्हावे,असे आवाहन राज्याचे जलसंपदा व लाभक्षेत्र विकास, शालेय शिक्षण, महिला व बालविकास, इतर मागासवर्ग, सामाजिक व शैक्षणिक मागास प्रवर्ग, विमुक्त जाती भटक्या जमाती आणि विशेष मागास प्रवर्ग कल्याण, कामगार राज्यमंत्री तथा जिल्ह्याचे पालकमंत्री ना. ओमप्रकाश उर्फ बच्चू कडू यांनी कुंभारी येथील ग्रामस्थांना केले.
कुंभारी येथील हनुमान ग्रामविकास प्रतिष्ठानमार्फत पालकमंत्री ना. ओमप्रकाश उर्फ बच्चू कडू यांच्या हस्ते गणेश महाविद्यालय, कुंभारी येथे निंब वृक्ष रोपणचा प्रारंभ आज करण्यात आला. यावेळी ना. कडू यांच्याहस्ते निंब वृक्षरोपण करण्यात आले. यावेळी कुंभारीचे सरपंच संतोषकुमार भटकर, पंचायत समितीचे सदस्य विजयभाऊ बाभुळकर, माजी आमदार तुकाराम बिडकर, तहसिलदार विजय लोखंडे, जय बजरंग मंडळाचे अध्यक्ष नारायणराव गावंडे, माजी सरपंच बाळासाहेब अतकरी उपस्थित होते.
यावेळी माहिती देण्यात आली की, हनुमान ग्रामविकास प्रतिष्ठानमार्फत ५०० निंब वृक्षरोपण केले जाणार असून आज त्यांची सुरुवात गणेश महाविद्यालय, कुंभारी येथून करण्यात आली. निंब वृक्षरोपण अविरत सुरु राहण्यासाठी सामाजिक वनीकरण मार्फत वृक्षरोपणाकरीता पाणी व दोनशे झाडामागे एक मजूर याप्रमाणे तिन वर्षाकरीता उपलब्ध करुन देण्यासाठी प्रस्ताव सादर करण्याचे निर्देश ना. बच्चू कडू यांनी संबंधितांना दिले. मागील वर्षी लावण्यात आलेल्या निंबवृक्षाची पाहणी करुन त्याची निगा राखल्याबद्दल त्यांनी ग्रामस्थांचे कौतूक केले.
शेंगाव-नरनाळा-चिखलदारा पर्यटन सर्कल तयार करुन पर्यटकांना दोन-तिन दिवस मुक्कामी राहता येईल, अशा पद्धतीने पर्यटन स्थळांचा विकास करण्याचा मनोदय त्यांनी यावेळी व्यक्त केला. त्यासाठी गावातील रस्ता दुरुस्ती व अन्य महत्त्वाची कामे करण्याबाबत त्यांनी उपस्थितांना आश्वस्त केले. वृक्षरोपणाच्या कार्यक्रमाला गणेश विद्यालय, कुंभारी येथील शिक्षक, कर्मचारी व परिसरातील नागरीक उपस्थित होते.
