अकोला – पूर्व वैमनस्यातुन तिघांनी मिळून बापलेकाची तलवारीने वार करून हत्या केल्याची घटना सोमवारी रात्री साडेअकरा वाजता खरप येथे घडली. पोलिस ठाण्यात गुन्हा दाखल होण्याआधीच हल्लेखोराना अटक करण्यात पोलिसांना दोन तासातच यश आले. सनातन अभिमन्यु शिरसागर (वय 60), त्यांचा मुलगा विजय सनातन शिरसागर असे मृत झालेल्या बापलेकांचे नाव आहे. या घटनेमुळे एकच खळबळ उडाली आहे.
सनातन शिरसागर व त्यांचा मुलगा विजय शिरसागर यांच्या अंगावर आकाश इंगळे, धम्मपाल इंगळे आणि जयपाल इंगळे हे तिघे तलवार आणि लोखंडी पाइप घेवून आले. या तिघांनी मागचपुढचा विचार न करता त्यांच्यावर हल्ला चढवला. त्यामध्ये बापलेक जागीच ठार झाले. या घटनेची माहिती सिव्हिल लाइन पोलिस स्टेशन व स्थानिक गुन्हे शाखेला मिळताच त्यांनी घटनास्थळ गाठले.
एकीकडे घटनेचा पंचनामा सुरू असताना दुसरीकडे स्थानिक गुन्हे शाखेचे पथक आरोपींच्या शोधकामी लागले होते. पथकाला मिळालेल्या माहितीनुसार त्यांनी आकाश इंगळे, धम्मपाल इंगळे आणि जयपाल इंगळे यांना अटक केली आहे. गुन्हा दाखल होण्याआधी पोलिसांनी आरोपींना ताब्यात घेतले आहे.
ही कारवाई एलसीबी प्रमुख शैलेष सपकाळ यांच्या मार्गदर्शनाखाली पोलीस उपनिरीक्षक सागर हटवार, जयंत सोनटक्के, किशोर सोनोने, शक्ति कांबळे, संदीप काटकर, आश्विन मिश्रा, वीरेंद्र लाड, आश्विन शिरसाठ, मोनोज नागमते यांनी केली. सिव्हिल लाइन पोलिस ठाण्यात गुन्हा दाखल करण्यात येत आहे. या घटनेमुळे एकच खळबळ उडाली आहे.
