अकोला, दि.१३(जिमाका)- महात्मा जोतिराव फुले शेतकरी कर्जमुक्ती योजना जिल्ह्यात राबविण्यात येत असून येत्या शुक्रवार दि. २१ पासून पात्र लाभार्थी शेतकऱ्यांच्या नावांच्या याद्या गावपातळीवर पहावयास उपलब्ध होणार आहेत. त्यानंतर शेतकऱ्यांनी आपले तपशिल पडताळून पहावयाचे आहेत. याबाबत शेतकऱ्यांमध्ये जनजागृती करण्यासाठी प्रचार रथास आज जिल्हाधिकारी जितेंद्र पापळकर यांनी हिरवी झेंडी दाखवून रवाना केले. जिल्ह्यात या प्रचार रथा सोबतच सोशल मिडीया, आकाशवाणी अशा माध्यमांचा वापर करुन शेतकऱ्यांमध्ये जनजागृती करण्यात येत आहे.
आज सकाळी जिल्हाधिकारी पापळकर यांनी जिल्हाधिकारी कार्यालयातून अकोला जिल्हा मध्यवर्ती बॅंकेमार्फत तयार करण्यात आलेल्या प्रचार रथास हिरवी झेंडी दाखवून रवाना केले. यावेळी त्यांचे समवेत निवासी उपजिल्हाधिकारी संजय खडसे, जिल्हा उपनिबंधक सहकारी संस्था डॉ. प्रवीण लोखंडे, जिल्हा अग्रणी बॅंकेचे व्यवस्थापक आलोक तारेनिया, अकोला जिल्हा मध्यवर्ती सहकारी बॅंकेचे सहाय्यक व्यवस्थापक गजानन पाटील आदी उपस्थित होते.
जिल्हाधिकारी पापळकर आज (दि.१४) आकाशवाणीवर
या संदर्भात महात्मा जोतिराव फुले शेतकरी कर्जमुक्ती योजनेबाबत सविस्तर माहिती देणारी जिल्हाधिकारी जितेंद्र पापळकर व जिल्हा उपनिबंधक सहकारी संस्था डॉ. प्रविण लोखंडे यांची मुलाखत आकाशवाणी अकोला केंद्रावरुन प्रसारित होणार आहे. ही मुलाखत शुक्रवार दि.१४ रोजी सायं. साडेसात वाजता किसानवाणी या कार्यक्रमात प्रसारित होणार आहे. आकाशवाणी अकोला केंद्राचे कार्यक्रम विभागप्रमुख विजय दळवी यांनी या मुलाखतीचे संचलन केले आहे. ही मुलाखत आकाशवाणी अकोला केंद्राच्या एफ एम बॅंड १०२.४ मेगाहर्ट्ज वर ऐकता येईल. तसेच आकाशवाणीच्या newsonair या ॲपवरही ऐकता येईल असे विजय दळवी यांनी कळविले आहे. शेतकऱ्यांनी ही मुलाखत ऐकून माहितीचा लाभ घ्यावा, असे आवाहन निवासी उपजिल्हाधिकारी संजय खडसे यांनी केले आहे.
