अकोला: विधानसभा निवडणुकीनंतर राज्यात सत्ता स्थापनेसाठी शिवसेना, काँग्रेस, राष्ट्रवादी काँग्रेसचा समावेश असलेली संभाव्य महाशिवआघाडी स्थापन होण्याची शक्यता आहे. तरीही आगामी जिल्हा परिषद निवडणूक शिवसेना स्वबळावर लढणार असल्याचे संकेत आहेत. जिल्हा परिषद निवडणुकीच्या अनुषंगाने शिवसेनेची बैठक झाली. यामध्ये निवडणुकीतील रणनीतीवर चर्चा करण्यात आली. ही निवडणूक कुणाच्याही मदतीशिवाय लढण्यावर एकमत झाले. पदाधिकाऱ्यांना कामाला लागण्याच्या सूचनाही नेत्यांनी दिल्या.
जिल्हा परिषद, पंचायत समितीच्या निवडणुकीत कोणत्या समाजाची किती मते आहेत, याचे गणित मांडून उमेदवार निश्चित करण्यात येतात. आता आगामी जिल्हा परिषद निवडणुकीत तुर्तास तरी शिवसेनेकडून सध्या तरी ‘एकला चलो रे’च्या अनुषंगाने पाऊले उचलण्यास प्रारंभ केल्याचे शनिवारी अकोल्यातील ‘सर्किट हाऊस’वर झालेल्या बैठकीत दिसून आले. यात ठरल्याप्रमाणे जिल्हा परिषदेच्या सर्व सर्कलमध्ये बैठका घेण्यात येणार आहेत. आधी सर्व तालुका प्रमुखांनी तालुक्यातील पदाधिकारी, कार्यकर्ते, शाखा प्रमुखांच्या सर्कलनिहाय बैठका घ्याव्यात. बैठकांची प्रक्रिया ३० नोव्हेंबरपर्यंत पूर्ण करण्यात येणार आहे. त्यानंतर पुढील महिन्यात सातही तालुक्यात जिल्ह्यातील प्रमुख पदाधिकारी बैठका घेणार आहेत. सोबतच संभाव्य उमेदवारांची यादी, विधानसभा निवडणुकीत सर्कलनिहाय मिळालेली मते आणि जिल्हा परिषदेमध्ये शिवसेनेला किती मते मिळू शकतात, याच्या अंदाजाची माहिती संकलित करण्याची सूचना बैठकीत देण्यात आली. त्याचप्रमाणे ए, बी, सी यानुसार सर्कलचे विभाजन करा, वर्गिकरणानंतर कोणत्या सर्कलवर किती लक्ष केंद्रीत करायला हवे, हे लक्षात येणार आहे. त्यानुसार माहिती सादर करा, अशाही सूचना शिवसेनेच्या स्थानिक नेत्यांनी पदाधिकाऱ्यांना दिल्या गेल्या.
बैठकीला शिवसेनेचे नवनिर्वाचित आमदार तथा जिल्हा प्रमुख नितीन देशमुख, निवासी उपजिल्हा प्रमुख गोपाल दातकर, दिलीप बोचे, बंडू ढोरे, मुकेश मुरुमकार, रवींद्र पोहरे, विकास पागृत, संजय शेळके, शाम गावंडे, रवींद्र मुर्तडकर, गजानन मानतकर आदी उपस्थित होते.
युती नसताना सेनेला फायदा
युती नसतानाच शिवसेनेचा राजकीय फायदा होतो, असा आजपर्यंतचा अनुभव आहे. त्यामुळे ग्रामीण भागात जनसंपर्कावर भर देऊन त्यांच्या अडचणी सोडवा, ग्रामीण भागातील प्रशासकीय कामे असल्यास थेट मला संपर्क करा, समस्या सोडविण्यासाठी प्रयत्न करण्यात येतील, असा सल्लाही आमदार नितीन देशमुख यांनी कार्यकर्त्यांना दिला.
