अकोला (प्रतिनिधी)- राष्ट्रवादी काँग्रेसचे तेल्हारा शहर अध्यक्ष तथा राष्ट्रवादी काँग्रेसच्या नगरसेविका सौ.सिमा पिवाल यांचे पती दिलीप पिवाल यांनी आपल्या शहर अध्यक्ष पदाचा व सदस्य पदाचा सुध्दा राजीनामा राष्ट्रवादी काँग्रेसचे जिल्हा अध्यक्ष यांच्याकडे दिल्यामुळे राष्ट्रवादी काँग्रेस मध्ये खडबळ उडाली होती.आज पिवाल यांनी थेट मातोश्री येथे शिवसेना पक्षप्रमुख उद्धव ठाकरे यांच्या हस्ते शिवबंधन बांधून शिवसेनेत प्रवेश केला.
१८ वर्षांपासून राष्ट्रवादी काँग्रेसशी जुळलेले कार्यकर्ता ते अनेक पदाची ज्यांनी आजपर्यंत जबाबदारी स्वीकारली व पक्षाचे काम केलेले राष्ट्रवादी काँग्रेसचे तेल्हारा शहर अध्यक्ष दिलीप पिवाल यांनी २२ ऑगस्टला आपल्या अध्यक्ष व सदस्य पदाचा राजीनामा राष्ट्रवादी काँग्रेसचे जिल्हा अध्यक्ष संग्रामदादा गावंडे व तालुका अध्यक्ष प्रा.प्रदीप ढोले यांच्याकडे दिला. त्यामुळे तेल्हारा शहरामध्ये राष्ट्रवादी काँग्रेसला खिंडार पडले आहे. राजीनामा दिल्यापासून अनेक चर्चाना उत आला होता की, पिवाल यांनी राष्ट्रवादी चा राजीनामा का दिला व आता नेमके कोणत्या पक्षात प्रवेश करणार या चर्चेला आज पूर्णविराम मिळाला असून त्यांच्या प्रवेशामुळे शिवसेनेची ताकद मात्र तेल्हारा तालुक्यासह जिल्ह्यात वाढणार आहे हे नक्की.
