बहुचर्चित केरळ नन बलात्कार प्रकरणातील मुख्य आणि महत्त्वाचे साक्षीदार असलेल्या फादर कुरियाकोस कट्टुथारा यांचा संशयास्पद मृत्यू झाला आहे. आज सकाळी जालंधरच्या दासुआ येथील एका चर्चमध्ये कुरियाकोस यांचा मृतदेह सापडल्याने खळबळ उडाली आहे. कुरियाकोस यांच्या मृत्यूचं नेमकं कारण स्पष्ट झालं नसलं तरी त्यांची हत्या करण्यात आल्याचा आरोप त्यांच्या भावाने केला आहे.
जालंधरच्या दासुआ येथील सेंट मेरी चर्चमध्ये कुरियाकोस यांचा मृतदेह आढळला आहे. कुरियाकोस यांच्या शरीरावर मारहाणीच्या खुणा सापडलेल्या नाहीत. त्यामुळे त्यांची हत्या करण्यात आली की त्यांनी आत्महत्या केली याचं कारणं स्पष्ट होऊ शकलं नाही. शवविच्छेदनानंतरच त्यांच्या मृत्यूचं नेमकं कारण स्पष्ट होणार आहे. कुरियाकोस यांनी बेडवर उल्टी केल्याचं आढळून आलं आहे. शिवाय त्यांच्या बेडवर रक्तदाबाचे औषधेही आढळून आली आहेत, असं सांगतानाच नन बलात्कार प्रकरणातील मुख्य साक्षीदार असलेल्या कुरियाकोस यांना कोणतंही संरक्षण देण्यात आलं नव्हतं, असं सूत्रांनी सांगितलं. केरळमधील नन बलात्कार प्रकरणी बिशप फ्रँको मुलक्कल यांच्यावर आरोप झाले होते. याप्रकरणी बिशप मुलक्कल यांच्यावर चौफेर टीका झाल्यानंतर त्यांना पदाचा राजीनामा द्यावा लागला होता. मुलक्कल यांच्याविरोधात फादर कुरियाकोसे यांनी साक्ष दिली होती. २०१४ ते २०१६ दरम्यान बिशपने बलात्कार केल्याचा आरोप पीडित ननने केला होता. या प्रकरणी कोर्टाने बिशप मुलक्कल यांना जामीन दिला आहे.
दरम्यान, कुरियाकोस यांची हत्या करण्यात आल्याचा आरोप त्यांचे भाऊ जोस कट्टुथारा यांनी केला आहे. गेल्या काही दिवसांपासून त्यांना धमकी मिळत होती, असंही त्यांनी सांगितलं. दरम्यान, कुरियाकोस यांचा मृतदेह सापडल्याची माहिती मिळताच जोस अल्प्पेकडे रवाना झाले आहेत. याप्रकरणाची ते तक्रारही करणार आहेत. तसेच जालंधर पोलीस ठाण्यातही ते गुन्हा दाखल करणार आहेत.
अधिक वाचा : #MeToo : लैंगिक छळाच्या आरोपानंतर केंद्रीय मंत्री एम. जे. अकबर यांचा राजीनामा
अकोला शी संबंधित सर्व बातम्यांसाठी आम्हाला फेसबुक, ट्विटर, यूट्यूब वर फॉलो करा.
अवर अकोला ला फेसबुक वर लाईक करा – www.facebook.com/OurAkolaMedia
अवर अकोला’च्या यूट्यूब चॅनेलला सबस्क्राईब करा – www.youtube.com/OurMediaNetworks
अवर अकोला ला ट्विटरवर फॉलो करा – https://twitter.com/ourakola
अवर अकोला ला इन्स्टाग्रामवर फॉलो करा – www.instagram.com/OurAkola
