काँग्रेसचे ज्येष्ठ नेते, माजी खासदार गुरुदास कामत यांचे आज सकाळी दिल्लीच्या चाणक्यपुरी येथील रुग्णालयात हृदयविकाराच्या तीव्र झटक्याने निधन झाले. ते ६३ वर्षांचे होते. कामत मुंबईतील लोकसभेच्या उत्तर पश्चिम मतदारसंघातून २००९ मध्ये निवडून आले होते. तत्पूर्वी ईशान्य मुंबई मतदारसंघातून ते १९८४, १९९१, १९९८ आणि २००४ मध्येही निवडून गेले होते. मुंबईच्या पश्चिम उपनगरात गुरुदास कामत यांचं वर्चस्व होतं.
गुरुदास कामत यांचा जन्म ५ ऑक्टोबर १९५४ रोजी कर्नाटकातील अंकोला येथे झाला. मुंबईत चेंबूर येथे त्यांचं बराच काळ वास्तव्य होतं. पेशाने वकील असलेले कामत यांनी मुंबईच्या आर. ए. पोदार महाविद्यालयातून पदवीपर्यंतचे शिक्षण पूर्ण केले आणि गव्हर्नमेंट लॉ कॉलेजमधून लॉची पदवी मिळवली. २००९ ते २०११ या कालखंडातील काँग्रेसच्या नेतृत्वाखालील आघाडी सरकारमध्ये गुरुदास कामत यांनी गृहमंत्रालयाचे राज्यमंत्रीपद सांभाळले. त्यांच्याकडे माहिती आणि तंत्रज्ञान खात्याचीही अतिरिक्त जबाबदारी होती.
१९८० मध्ये महाराष्ट्र प्रदेश युथ काँग्रेसच्या सरचिटणीस पदी कामत यां ची नियुक्ती झाली. त्यानंतर १९८४ मध्ये ते महाराष्ट्र प्रदेश युथ काँग्रेसचे अध्यक्ष झाले. २००३ मध्ये कामत मुंबई काँग्रेसचे अध्यक्ष झाले. २००८ पर्यंत ते मुंबई काँग्रेसचे अध्यक्ष होते. २०१३ मध्ये अखिल भारतीय काँग्रेस समितीच्या महासचिव पदावर त्यांची नियुक्ती करण्यात आली. त्यांच्याकडे राजस्थानस गुजरात, दादरा-नगर हवेली, दिव-दमणची जबाबदारी सोपवण्यात आली होती. २०१४ मध्ये त्यांचा लोकसभा निवडणुकीत शिवसेनेच्या गजानन किर्तीकर यांनी पराभव केला. २०१७ मध्ये मुंबई काँग्रेसमधील वादाच्या पार्श्वभूमीवर त्यांनी काँग्रेसच्या सर्व पदांचा राजीनामा दिला.
